Служба Собору Екатеринбуржских святых

Скачать DOC

Месяца януария в 29-й день

СОБОР ЕКАТЕРИНБУРЖСКИХ СВЯТЫХ

Краегранесие службы сия: Похвалу собору святых Екатеринбуржскнх чтец Петр смиренно воспевает.

НА ВЕЛИЦЕЙ ВЕЧЕРНИ.

На Господи, воззвах: стихиры на 8, глас 4:

Приидите, православных совокупления,/ похвальная вознесем пения/ всем святым, в земли Екатеринбуржстей просиявшим,/ венцы славы украшенным от Подвигоположника Христа Бога нашего./ Темже восхвалим богоугодныя их подвиги,/ любве ради к Богу и ближним подъятыя,/ и вси согласно воззовем:/ молитеся, святии, ко Господу,/ да оставит нам прегрешения наша/ и спасет ны,// великия ради Своея милости.

Отечествия Небеснаго/ от земнаго вашего Отечествия всыновление честно приимше,/ святии Церкве Екатеринбуржския,/ темже ныне Церковь Русская достойно хвалит вас,/ вы бо добродетельное житие на земли скончавше,/ учением богоразумия наставляете ны,/ источницы чудес предивнии,/ звезды светлыя, небо Церковное украшающия,/ Россию же и всю вселенную удобряющия:/ свободите ны от всяких напастей лютых/ и искушений вражиих,// молящеся о душах наших.

Христову неизреченному терпению/ и трудом преславным подражающе,/ в терпении мнозе и труде велием/ житие свое иждили есте,/ Екатеринбуржския земли честная прозябения неборасленная,/ темже аки некое созвездие предивное всем сияете,/ всех убо подвижник ныне совершающе память,/ согласно вси воззовем:/ радуйтеся, тесным вашим житием// в широту Царствия Небеснаго преславно востекшии.

Вертограду многоплодному/ уподобися Церковь Екатеринбуржская,/ от неяже произыде святых множество,/ ихже днесь торжество совершающе,/ в память приведем честныя их яже о Бозе подвиги,/ и от оных наставление приемлем,/ добродетелей сих причастие улучити желающе,/ паче же нищету свою духовную ведуще,/ смирение оным святым воззовем:/ молитеся о нас ко Господу,/ да избегнем лукаваго ловления/ и честным вашим предстательством// вход да обрящем в Царствие Небесное.

Слава, глас 5:

Агнцу Божию/ вседушне последовали есте,/ Духом Божиим освященнии,/ житие же на земли  благочестно скончали  есте,/ мученицы,  исповедницы, блаженнии, праведнии/ и вси прочий угодницы Божий,/ земли Екатеринбуржския похвало/ и всея России преславное радование,/ предстояще днесь престолу Святыя Троицы,/ сиянии неизреченными Невечерняго Света озаряеми,/ просветите оттуду нас,/ честную вашу память совершающих,/ молящеся непрестанне// даровати нам мир и велию милость.

И ныне, Богородичен, глас тойже: В Чермнем мори:

Вход. И чтения три мученическая.

 

 

На литии стихиры, глас 6:

Любве Христовы шествие/ от земных к Небесным всехвальне подражали есте,/ святии земли Екатеринбуржския,/ вы бо начертаете закон Христов на скрижалех сердец своих,/ и тако жительствовати вся призываете./ Темже всехвальную память вашу празднующе, молим вы:/ молитеся непрестанне ко Господу,/ да утвердит ны невидимою Своею свыше силою,/ во еже противостати миру, плоти и диаволу,/ и препобедивше я,/ венец прияти от руки Стасовы// в Небеснем Царствии.

Утверждени явлыииися благодатию Божиею,/ возжадасте на земли Правды Небесныя/ и взалкаете Истины Предвечныя,/ темже веление Спасово исполняющее о житии святем и непорочнем,/ во еже усовершитися во образ Отца Небеснаго,/ время земнаго странствия вашего свято совершили есте./ Темже и Небесный всех святых собор/ радостию души ваша восприят в недра своя./ С ними же предстояще престолу Божию,// молитеся непрестанне о всех нас.

Слава, и ныне, глас 3:

Сила Божия, в немощи совершаемая,/ в подвизех ваших земных небесное воздаяние вам уготова,/ вси святии Церкве Екатеринбуржския,/ вы бо преподобием и правдою поживше,/ смерть аки восход к небеси восприяли есте;/ темже и пред престолом Божиим предстоите,/ сего ради молим вы:/ приимите моления верных чад своих,/ да избавимся сетей вражиих,/ злых напастей и лютых недугов,// вас бо теплых ходатаев пред Господ ем стяжахом.

На стиховне стихиры, глас 4:

Облак имуще свидетелей, облежащий нас,/ земли Екатеринбуржския прозябения славная,/ яже по слову апостольскому,/ верою послушествовани быша,/ Господу принесоша в терпении плод сторичный,/ твердо и мы, братие,/ да течем на предлежащий нам подвиг,/ взирающе на Начальника веры и Совершителя Господа Иисуса,/ укрепляющеся же сих святых небесным ходатайством,/ празднующе память их, согласно да вопием:// молитеся о душах наших.

Стих: Господи, Господь наш,/ яко чудно Имя Твое по всей земли.

Богоносных страстотерпцев,/ преподобных и праведных, и всех святых,/ в земли Екатеринбуржстей просиявших,/ ныне память совершающе,/ внидем, братие, в радость днесь,/ се бо Церковь Русская торжествует всехвальный собор их,/ поучающи ны благочестно// евангельскому их еже по Бозе жительству.

Стих: Святым, иже суть на земли Его,/ удиви Господь вся хотения Своя в них.

Освященнии Духа Святаго свыше Небесными зарями,/ святии страстотерпцы,/ исповедницы, преподобнии, праведнии и блаженнии,/ иже в пределех Екатеринбуржских благоугодиша Господеви,/ вознесите молитвы о месте, идеже подвизалися есте,/ яко да исполнение всякия благодати/ обитающий на нем приимати имут,/ мир и благоденствие тамо да пребывает неизбывно,/ яко да во всяком благочестии и чистоте в нем жительствующий// восход безпреткновенен обретают в Царствие Небесное.

Слава, глас тойже:

Радуйтеся, земли Екатеринбуржския крепцыи хранителие и заступницы,/ страстотерпцы Христовы,/ исповедницы, праведницы и вси прочий святии,/ болящих безмезднии врачеве/ и всех напаствуемых скории свободителие,/ алчущих кормителие и нагим одежды подателие,/ всем же во всем по коемуждо потребе помощницы,/ христианом всем премудрии наставницы:/ будите нам забрала необоримая// и о всем мире теплии ходатаи.

И ныне, Богородичен.

Тропарь собора Екатеринбуржских святых, глас 4: Украшается днесь Святая Церковь,/ торжествующи собор святых земли Екатеринбуржския,/ и яко зарями просвещается светло в памяти их,/ вся призывающи стезями их честнаго жительства шествовати,/ и в терпении спасение свое соделовати;/ темже притекающе к ним верою, возопиим:/ молитеся ко Господу,/ мир даровати мирови,// и душам нашим велию милость.

НА УТРЕНИ

На Бог Господь: тропарь святым дважды. Слава, и ныне, Богородичен.

По 1 -м стихословии седален, глас 1:

Солнца правды,/ Христа сияние в душах своих вселыпе,/ яко свещницы на престоле возсияли есте,/ святии Екатеринбуржстии,/ темже в памяти вашей вернии людие празднуют,/ Небеса радуются/ и земнии концы торжествуют.// Темже молитеся за ны ко Господу.

Слава, и ныне, глас тойже:

Воли Божией вседушно себе вдавши, Дево Всенепорочная,/ Сына Божия без нетления родила еси./ Темже моли, Богородице, за люди,// ихже Сын Твой предаде заступлению Твоему.

По 2-м. стихословии седален, глас 2:

Яко многоцветие благовонное,/ израсли есте, святии Екатеринбуржстии,/ темже потоцы правоверующих притекают к вам неоскудно,/ просяще вышняго мира мирови,/ душам же и телесем своим яже на пользу// спасительная и благодатная дарования.

Слава, и ныне, глас тойже:

Творца всяческим недоуменно рождши,/ Дево Пренепорочная,/ уранила еси  главу  иногда  змия  древняго/  и  державу  мучительства  его  всеславно сокрушила еси./ Ныне же одесную престола Сына Своего предстоящи,/ моли спастися нам,// верою и любовию Тя почитающим.

Величание:

Величаем вас,/ святии вси в земли Екатеринбуржстей просиявший,/ и чтим святую память вашу,/ вы бо молите о нас// Христа Бога нашего.

По полиелеи седален, глас 5:

Истинный Духа Святаго сад мысленный/ ты явися, славная Екатеринбуржская земле!/ В тебе бо собра Господь, аки плоды некия, страстотерпцы многия славныя,/ исповедники, преподобныя, праведныя и иная многих святых множества./ Темже имуще толик облак свидетелей, вернии,/ подражаим славному их еже по Бозе деланию,/ да и по преселении от земных к небесным/7 улучим благ нетленных причастие.

Степенна, 1 -и антифон 4-го гласа.

Прокимен, глас 4: Дивен Бог во святых Своих,/ Бог Израилев.

Стих: В Церквах благословите Бога, Господа от источник Израилевых.

Евангелие от Матфея, зачало 11.

 Слава: Молитвами сонма святых земли Екатеринбуржския,/ Милостиве, очисти// множества согрешений наших.

И ныне: Молитвами Богородицы:

По 50 псалме стихира, глас 6:

Христово иго на рамена своя подъемше,/ подвиглися есте тесным путем в Царствие Божие внити./ И ныне во Свете невечернем ликовствуете/ со ангельскими воинствы,/ зряще пачеестественную славу Божию;/ не оставите ны своею любовию,/ святии Церкве Екатеринбуржския,// низводяще нам великия и богатыя милости.

Канон, глас 8. Песнь 1.

Ирмос: Внезапу древле море Израиль,/ яко в пустыни, ногою прашною прошед вопияше:// Господеви Богу нашему, крепкому в бранех, поим песнь новую.

Припев: Вси святии земли Екатеринбуржския,// молите Бога о нас.

Екатеринбуржския земли святых собор/ потщимся призвати молитвою, вернии людие,/ яко да всяческая яже на пользу бываемая/ ходатайством их улучим./ Темже сию песнь зачинающе,/ тако Господеви возгласим:/ даруй нам, Боже, разум и силу// желаемое нами добре днесь совершити.

Крест Христов,/ святе Симеоне Верхотурский,/ на раму свою возложь,/ веселыма ногама прешел еси во упокоение трудов твоих,/ темже предстоиши престолу Божию,/ венец победы на главе своей имый/ и Господеви поя:// Помощник и Покровитель бысть мне во спасение.

Ангельски ныне торжествуете,/ преподобие Василисче Сибирский/ и Зосимо, Смоленское Церкви Екатеринбуржстей приношение,/ житие бо свято поживше/ терпением многим/ и повсечасным разсуждением полезных,/ молитеся за ны ко Господу,// славно бо прославися.

Богородичен: Тьмы делания бесовскаго,/ Мати Божия,/ рождеством род человеч свободила еси,/ Свет истинный рождши Христа,/ темже потщися испразднити/ еже о нас духов нечистых тщание,// далече огнем Света Божественнаго сих прогоняющи.

Песнь 3.

Ирмос: Уподоби мя, Христе, умно горе Сионстей,/ возвысивый и утвердивый в надежди о Тебе/ и искапавый росу благодати,// Человеколюбие.

Единаго на потребу взыскуя,/ царствия земнаго лишился еси,/ святе страстотерпче Николае,/ обаче паче царей земных/ славу на Небеси стяжал еси;/ темже венец победы на враги терпением улучив,/ Искупителю своему радуяся предстал еси,/ крове своея излияния подвиг принесый.// Моли о всех, тебе молитвою призывающих.

Радуйтеся, Александро, супруго страстотерпца царственнаго,/ со чады Алексием, Ольгою, Татианою, Мариею и Анастасиею,/ вы бо воистину явистеся аки Церковь малая,/ главе своей во всех приключшихся обстояниих последующе,/ сего ради красный славный восход Небесный вкупе восприяли есте./ Ныне же имуще венцы мученическия на главах своих,/ молитеся ко Господу,// умножити в земли вашей веру и благочестие.

Истине верность до конца соблюдите,/ преподобия венцы кровьми мученическими украсили есте,/ Елисавето и Варваро,/ темже тленная на нетленная преложше,/ Господеви по всем уневестилися есте,/ Емуже молитеся,// да умножит веру и благочестие в земли нашей.

Богородичен: Новаго Израиля Царице,/ единаго Искупителя нашего Мати, Дево Богородице,/ страну Русскую не презрела еси,/ но державным Твоим манием,/ во время разлучения кесаря Николая с земным царствием,/ скипетр власти в ней Сама прияла еси,/ икону Державную во знамение сего предивно даровавши./ Темже молим Тя:// низложи в земли Твоей враги Правды Божия.

Седален, глас 3:

Богу житием своим и смертию угодивше,/ святии Екатеринбуржстии,/ водворилися есте на земли праведных/ в Небеснем Царствии,/ идеже наслаждаетеся неизреченных благ,/ яже Господь уготова Его любящим,/ ихже око не виде и ухо не слыша,/ и на сердце человеку не взыдоша.// Темже предстательствуйте ныне за ны ко Господу.

Песнь 4.

Ирмос: Услышах слух Твой, Господи, и убояхся,/ разумех дела Твоя и ужасохся,/ яко посреде двою животну познаешися// во спасение душ наших.

Усердие Господу последовал еси,/ священномучениче Аркадие,/ на высоте бо престола апостольскаго всед,/ со расколы и безбожием изрядный борец показался еси,/ жертву безкровную Богови принося;/ кровь мучения своего/ ко Престолу Пастыреначальника радуяся принесл еси,/ темже яко адамант/ в венце Церкви Екатеринбуржския вчинился еси:// моли непрестанно о всех нас.

Растерзали есте паучину страстей/ и козней бесовских соузы расторгли есте,/ славнии преподобнии Илия и Арефо/ со блаженными Косьмою и Иоанном Верхотурскими,/ темже днесь мзду праведную приемлете в рай сладости:// молите непрестанно о всех нас.

Жизнь вечную ныне/ улучили есте, славнии Иосифе Верхнетагильский,/ Петре Кочневский и Павле Новоуткинский,/ вы бо словом Евангелие проповедавше,/ смертию своею мученическою,/ аки печатию нерушимою, истину его запечатлели есте:// молите непрестанно о всех нас.

Богородичен: Сына Божия воплощению/ всемудренно послужила еси, Мати Божия,/ темже Воинства Небесная достойно славят Тя,/ мы же земнороднии, песни смиренныя слагающе,/ аки рыбы безгласныя обретаемся,/ но, о Богородице,/ всемощным Твоим предстательством// грехов оставления нам у Господа исходатайствуй.

Песнь 5.

Ирмос: Блаже, Света и Мира Подателю,/ от тьмы мя и брани страстей избави, утренююща, Христе,// к Твоему хвалению.

Како восхвалим вас,/ славнии диакони Иоанне Старопышминский и Вячеславе Невьянский,/ вы бо первомученику архидиакону Стефану подражающе,/ убиение неправедное веры ради восприяли есте,/ темже и мученическому сонму на небеси вчинившеся,// молитеся за вся иже верою вы почитающия.

Истину Благовестия Христова/ честным крове своея излиянием яве показавше,/ священномученицы Владимире Тупицынский,/ Иоанне Федьковский и Петре Невьянский,/ сугубыя награды от Господа прияли есте,/ священства добраго и мученичества славнаго:// молитеся за вся иже верою вы почитающия.

Христа вернии подражателе бывше,/ священномученицы Сергие Нижнетагильский,/ Константине Меркушинский и Николае Коптеловский,/ процвели есте яко финиксы в Небеснем Отечествии,/ суету бо презревше власти безбожныя,/ от власти Божия приемлете днесь праведное воздаяние:// молитеся за вся иже верою вы почитающия.

Богородичен: Честнейшая Херувим сущи,/ и без сравнения Серафим славнейшая,/ Мати Дево Богородице,/ благодати Божия причастие испроси/ у Сына Твоего и Бога нашего// всем к Твоему предстательству с верою теплою притекающим.

Песнь 6.

Ирмос: Яко Иону пророка от кита возвел еси, Господи,/ избави мя от ловитвы чуждаго// и спаси мя, Щедре, яко Многомилостив.

Тьмы погибельныя/ верным служением Богови избегли есте,/ священномученицы Иоанне и Иоасафе Мироновские,/ вкупе со Павлом Мурзинским,/ света же Божественнаго достигаю,/ престолу Божию на Небеси достойне предстали есте,/ темже осияйте оттуду дары благодатными// к заступлению вашему тепле притекающий.

Естества падшаго греховное стремление пресекли есте,/ преподобномученицы Верхотурстии Аполлинарие, Иакинфе и Каллисте,/ темже, кровь на земли за Христа пролиявше,/ яко дивныя птицы райския/ в лучах света Небеснаго воспарили есте,/ в немже днесь Господеви предстояще,// поможение дивное чтущим вас исходатайствуйте.

Церкве Христовы бысте вернии слуги,/ священномученицы Петре и Алексие Верхнесалдинстии/ со преподобномучеником Верхотурским Вениамином всехвальным./ Вы бо ревность духовную восприимше,/ утвердили есте сердца своя/ силою Вседержителевою,/ онаго же дара причастие и нам низпослите,// молим вы верою и любовию.

Богородичен: Пречистая Богомати,/ христиан упование,/ силою славнаго ходатайства Твоего/ да подаст нам Господь прощение и милость,/ да обновит силою свыше/ и да утвердит в нас верность Ему,/ Тому бо аще и согрешаем,// обаче же инаго бога не вемы.

Кондак, глас 3.

Подобен: Дева днесь предстоит в церкви:

Днесь святых честный собор предстоит в Церкви/ и невидимо за ны молится Богу,/ страстотерпцы с преподобными покланяются,/ исповедницы и праведницы со блаженными ликовствуют,/ и вси святии Церкве Божия торжествуют,/ паства же земли Екатеринбуржския веселится:// молят бо вси купно Превечнаго Бога.

Икос:

Твердою верою себе укрепивше,/ Екатеринбуржстии светы,/ земнаго сего многоплачевнаго и многотруднаго жития/ тьму препобедили есте,/ сонму чад Божиих вчинившеся./ Приимите убо нашего неможения приношение/ и наставите ны вере истинней/ и житию богоугодному,/ яко да улучивше вашим теплым предстательством Царствие Божие,/ сподобимся причаститися/ присноблаженнаго и всерадостнаго еже с вами пребывания./ Темже ублажающе честную память вашу,/ похвальная вам зовем:/ радуйтеся, заступницы наши// и всея Руси славо и удобрение.

Синаксарий.

В день сей двадесять девятый яннуария месяца, память творим собора Екатеринбуржских святых. Праздник сей установлен бысть в лето две тысящи десятое от Рождества по плоти Бога Слова, тщанием Высокопреосвященнейшаго Викентия, архиепископа Екатеринбуржскаго и Верхотурскаго, благословением же Святейшаго Кирилла, Московскаго и всея Руси Патриарха. День же сей избран бысть не праздно, но нарочито, основана бо бысть в сей день епархия Екатеринбуржская.

Овии от торжествуемых днесь святых во оных местех подвизашася, овии токмо скончашася, обаче подвиги своими от сея земли всю вселенную удобриша. Числом же их шестьдесят четыре.

От них суть славнейший в человецех сии: преподобный Симеон Верхотурский; царственнии страстотерпцы Николай, Александра, Алексий, Ольга, Татиана, Мария и Анастасия; преподобномученицы Елисавета и Варвара; священномученик Аркадий; преподобный Василиск Сибирский.

Сих кроме обретаются еще малознаемии в людех, но пред Богом равнославнии святии, пятьдесят два. От них преподобных три и блаженных два. Прочий же сорок седмь пострадаша во времена безбожныя власти, грех ради людских в стране нашей Богом попущенныя. Овии смертьми мученическими умроша, овии же исповеданием твердым венчашася.

Сих всех честную память творяще, потщимся поучитися терпению и вере их: сими бо святии наши Богови благоугодиша, Емуже слава и держава, ныне и присно, и во веки веков. Аминь.

Песнь 7.

Ирмос: Подражатели триех Твоих, Господи, отроков сотвори ны,/ сопротивляющияся греху,/ и огнь страстей попирающия, и поющия:// благословен еси, Боже отец наших.

Расторгли есте безбожия наглое шатание,/ святии славнии священномученицы Алексие Ницинский,/ Константине Артемовский и Платоне Покровский,/ верою бо безверие победивше,/ широты Царствия Божия достигосте,/ сего ради мы согласно вопием:// благословен еси, Боже отец наших.

Смертию вход в жизнь вечную стяжали есте,/ святии священномученицы Стефане Краснослободский,/ Константине Родниковский и Петре Большетрифоновский,/ по слову бо Апостолову,/ вам еже жити Христос,/ и еже умрети приобретение есть,/ сего ради радующеся вопием:// отец наших Боже, благословен еси.

Мира сего тленнаго ловления славно избегше,/ преподобноисповедниче Иоанне Верхотурский/ и священномученицы диакони Александре Большетрифоновский и Николае Шогринский,/ Царствие Божие унаследовали есте,/ темже добропобедни суще,/ милости от Господа исходатайствуйте поющим:// отец наших Боже, благословен еси.

Богородичен: Иныя Предстательницы о нас ко Господу/ паче Тебе теплейшия не вемы, Богородице,/ темже отверзи нам двери милосердия Твоего,/ и руце Свои пречистеи к Сыну Своему простерши,/ молися за ны усердно,/ да помилует ны грешныя,/ великия ради Своея милости,// и дарует вход в Царствие Небесное.

Песнь 8.

Ирмос: Разжжите пещь седмерицею,/ дон деже до конца разгорится,/ мучитель рече халдеом,/ Ананию, Азарию и Мисаила, вложите я в ню,/ иже образу златому не поклонишася, но глаголаху:/ мы Бога имамы на Небесех,// Емуже служим и покланяемся во веки.

Рабства бесовскаго велемудренно избегли есте,/ священномученицы Василие и Петре Каменск-Уральстии/ вкупе со Аркадием Боровским,/ темже в свободу чад Божиих/ на Небеси славно внидосте, взывающе:/ мы Бога имамы на Небесех,// Емуже служим и покланяемся во вся веки.

Еже на пользу души своея избравше,/ священномученицы Василие Камышловский,/ Александре Травянский и Константине Уецкий,/ вред плоти нивочтоже вменили есте,/ со дерзновением же слугам бесовским возгласивше:/ мы Бога имамы на Небесех,// Емуже служим и покланяемся во вся веки.

Надеждею благою на безбожныя враги вооружившеся,/ священномученицы Колчеданстии Стефане, Георгие и Несторе,/ ранами своими и кровьми/ победу славную на супостаты показасте,/ восход же в рай сладости восприясте, вопиюще:/ мы Бога имамы на Небесех,// Емуже служим и покланяемся во вся веки.

Богородичен: Немолчно воспеваем Тя, Богородице,/ Ты бо дело изрядное на земли совершивши,/ и славу велию на Небеси улучила еси,/ не презри убогаго моления нашего,/ но потщися еже на пользу нам даровати,/ простри благодать утешения нам грешным,/ ко исправлению потребную,/ и никогдаже оставляй нас,// Пречистая Богородице.

Песнь 9.

Ирмос: Воплощения Божия орган, Дево, была еси,/ и смешения Слова в плоти еже от Тебе Чертог,/ соединенома бо Существома,/ сугубыма действома и хотеньма показуема,// Егоже поюще, Тя, Богородице, величаем.

Оградите нас козней диавольских,/ святии священномученицы Василие Таушканский,/ Николае Каменск-Уральский и Алексие Корюковский,/ вы бо пачеестественною любовию к Богу пылающе,/ древняго врага рода нашего попалили есте,/ победы же венцы на Небеси увязеннии,// молитеся о иже любовию к вам притекающих.

Ветхаго и скорогибнущаго устранившеся,/ святии славнии священномученицы Льве Красноуфимский,/ Константине Троицкий и Феодоре Слободотуринский,/ новыя благодати страдальцы явилися есте./ Сего ради веру посреде безбожия до конца соблюдше/ и во умножении беззакония любве не угасивше,/ осуществление узрели есте надежды своея благия на Христа,/ веселящеся же днесь с лики ангельскими,/ молитеся о иже верою и любовию// память вашу почитающих.

Оставивше многоплачевное сие житие,/ смерти мученическия за Христа вкушением/ приясте всерадостное в Царствии Небеснем пребывание,/ Александре и Алексие, священномученицы Красноуфимстии,/ и преподобномучениче Ардалионе,/ иже Быньгам, Старопышминску, Ревде и Екатеринбургу со Невьянском радование,/ темже молитеся за ны,// верою и любовию память вашу светло празднующих.

Богородичен: Слезы наша горькия изсуши/ сладким веянием моления Твоего, Пречистая,/ скорби наша на радость преложи/ мощным Твоим еже о нас ко Господу предстательством,/ Церковь Православную утверди,/ новыя святыя Екатеринбуржстей земли,// Руси и всему миру ходатайством Твоим устрояющи.

Светилен, глас 1:

Подвиг ваших труды/ никто от земнородных не может изъяснити,/ ниже уразумети силу благодатную, от Бога вам дарованную,/ темже призрите свыше на ны,/ святии угодницы Екатеринбуржстии,// к заступлению вашему тепле притекающия.

Слава, и ныне, глас тойже:

Естества чин побеждается на Тебе, Богородительнице,/ невместимаго бо Небесы/ во утробе Твоей волею Божиею вместила еси на земли,/ и нетленно родила еси Отроча Вечнолетное,/ печать девства сохраньши./ Сего ради покрый вся воспевающия Тя,// силою небеснаго ходатайства Твоего.

На хвалитех стихиры, глас 2:

Восхвалим, вернии людие,/ Екатеринбуржския земли благолепное преподобных множество,/ в нихже Василиск, Зосима и Арефа со Илиею,/ аки предивныя благоуханныя отрасли,/ подвиги и ученьми своими вся услаждают,/ иже добре и мужественне подвизавшеся на земли,/ яко солнце просияша на Небеси,/ путь в Царствие Божие ясно указуют всем// с верою и любовию к ним притекающим.

Ангелом равностояние восприяша на Небеси/ страстотерпцы и исповедницы земли Екатеринбуржския:/ священномученик Аркадий со многими иереи и диаконы,/ иночествующими и мирскими,/ в нихже царственнии страстотерпцы и игумения Елисавета,/ аки некое изрядное украшение обретаются,/ мучений бо лютых и нуждныя смерти вкусивше,/ терпением вся превзыдоша,/ темже и водворение небесное улучиша./ Сего ради согласно к ним вопием:/ избавите ны от страстей и врагов,// и смерти лютыя.

Единому Богу благоугождати ищуще,/ праведнии и блажении Церкве Екатеринбуржския,/ в нихже Верхотурския славныя леторасли/ Симеон, Косьма и Иоанн изрядствуют,/ тщанием Господеви потрудившеся,/ во Отечествие Небесное веселыми стопами востекоша./ Темже и оттуду озаряют светло вся/ иже честную память их совершающия/ и житие многотерпеливое воспоминающия./ Сего ради верою сердечною подвизаеми благочестно, тако рцем:/ молитеся непрестанно ко Господу,// да дарует нам грехов оставление и велию милость.

Слава, глас 6:

Троицы славныя слуги показалися есте,/ вси святии земли Екатеринбуржския,/ вы бо заповеди и оправдания Господни верно сохраныле,/ всеми многотрудными подвиги вашими,/ тщание о вере святей показали есте,/ темже мзду достойную одесную престола Божия восприемлете/ и вся ны оттуду назираете./ Молитеся ко Господу,/ да дарует нам грехов оставление// и всякия благодати исполнение.

И ныне, глас тойже: Богородице, Ты еси лоза истинная:

Великое-славословие, ектений и отпуст.

НА ЛИТУРГИИ

Блаженна от канона, песнь 3-я и 6-я.

Прокимен, глас 8: Веселитеся о Господе/ и радуйтеся, праведнии.

Стих: Блажени, ихже оставишася беззакония и ихже прикрышася греси.

Апостол, зачало 213.

Аллилуйя, глас 4: Воззваша праведнии, и Господь услыша их, и от всех скорбей их избави их.

Стих: Многи скорби праведным, и от всех их избавит я Господь.

Евангелие от Матфея, зачало 38.

Причастен: Радуйтеся, праведнии, о Господе,/ правым подобает похвала.

Просмотров (486)

Оставить комментарий

Перейти к верхней панели